بس گوليلي أحبَك

بس گولي أحبَك ورَيحّيني
لا من الشفَة أريدها ولا من العين آخذها
من الگلب نقشيها بالأذنين
وصرخة اريدها تْسَمّع القُطبين
بس گوليها
والله لأصير قَس وأقدّس
وأبني بصَدر بيتي مَذبَح وأشَمْس
بس گوليها
لأخلي المايصَلي
قطعَة الخُبز بالخَمر يْغَمّس
من كثر التراتيل لسانه يعَلس
والمايصوم بصحن إضراب الطعام يغمّس
بس گوليها
لاخلي كل الدنيا تشد وصْلَة وترگُص
ومااخلي مخلوق من هالرگصة يملص
بس گوليها
لأرگص بعز البرد على گاع من ثلج
وأخلي الثلج من العَرَگ يموع
والتعب الي يستسلم وبكلمة الهزيمة يزوع
لأخيط هدوم العرس لكل الناس
واخلي الألوان تزين كل الأجناس
بس گوليها
لأامشي على دروب بيها شوك وماتنداس
لأمشي بخطوات بمقاييس الدنيا ماتنقاس
واقفز من سطح السطح
وأزين الجدران بلافتة حواشيها من نحاس
وقماشها من صور النسوان
وحروفها من حب النسوان
وحبالها من شَعر النسوان
بس طلعيها من حلگچ
وخليها نسمَة وتهب من يمچ
بس گوليها وبس نطقيها
لأوگف بأكبر شوارع أمستردام وأهَرج
لأوگف بأكبر شوارع جنيف وأصيح
هنيالي وقرة عيني
وألله لأأهز برلين
وأتظاهر ويا العُشاق بنص هوليوود
وأعلن عطلة بكل مدريد
واحتفالات الحب باليونان
وأغني بلندن بعالي الصوت وأخلي اللي بطوكيو يسمع
وأخلي عشاق ميشغان على صوتي ير گصون
وكل بنات باريس يهزون
وكل شباب بغداد يدبكون
واخلي كل رهبان روما بصوت واحد يرتلون
وبساحة القديس بطرس وبصوت واحد للرب ينشدون
وكل طيور الحَُب لعيونچ يغردون
بس گولیها
لاخلی الناس بلا مشروب تسکر
وکل حزن وكل بچي تنكر
بس گوليها
لأذبح أغنام وأبقار
وأسوي بنص سدني وليمة حب ووقار
وأكتب اسفار وأنثار
على كل حائط وعلى مياه الثرثار
وأمنع على كل شجرة وكل غصن حب سنون المنشار
وأطفي كل حرب وكل نار
بس مااريدچ تخليني محتار
گوليها ونطقيها وألعن أبو التاليها
چذبي عليّ وگوليها
وگولي الگلبك أهديها
وقبل مااموت بنص گلبي أحويها

نهاد حناني
هولاندا
27-01-2008